Veer (Ludy van Dijk, 17 jaor en Lou Clermonts, 22 jaor ) troffen mekaar touvallig op Asselegoons dag 1985 in Kaffee ut Heukske oppe Statensingel in Mestreech. Pa Nico Clermonts waor in de Kaffee, en dee gamin Ludy zaot bove op de biljart te speule op de knôp-örgel, mèt neve zich e drumstel zóónder drummer ( dee had sjeinbaar te deep in ut gleeske gekeken ). Umtot miene pa wis tot iech e lekker stökske kôs drumme, belde heer miech gaw op um naor de Statensingel te komme, en dat deeg iech daan ouch mèt mien bongo's oonder d'n errèm. Veer zien same goon speule dao, ut klikde waanzinnig, en de Fiësta's waore gebore. Ludy waor unne geniale accordeonis, dee ouch nog un gooj zangstum had. Heer woende zien ganse jäög beij opa & oma Moenen, en opa waor ouch unne gooje moneka speuler, dee furore had gemaak mèt meziek oet die gouwe '50's / '60's. Ludy kraog dee gezellige meziek mèt de paplepel ingegote en dee meziek is ouch de roeje draod gewees in us 28-jaorige Fiësta's carrière! Eind jaore '80 krege veer 'n leuke bekindheid in de regio Mestreech door uzze speulstijl en dito gezellig dansbaar rippetwaar. De keers op de slagroom waor ut oetbringe vaan un échte CD mèt 14 nommers vaan us rippetwaar. De vraog heijnao bleek enorm, en de optreijes op broelofte, Karneval en aander feeskes waore neetmie beij te hawwe. Ut waore én bleve gouwe teije in de levende meziek, de ein nao de aander CD woort zier suuksèsvol opgenome middels plate/CD contracte beij resp. Marlstone Recordings én later beij Pebble Music. Oondertösse bleke veer boete leuke muzikante ouch nog ut leedsjes componere en teks-sjrieve behuurlik te beheerse en höbbe Ludy en iech tal vaan leedsjes gecomponeerd veur legio Mestreechse artieste. Dit dus mèt eige werrèk, mér ouch leuke kovvers, die vaan orizjineel dialek tekste woorte veurzeen. Dingk heijbeij aon "Meh me Lepke", "ut Reuzeraad", "dee Accordeon", "de Sjele & de Kromme", "d'n Druimer", "Mucho Amore", "Ach medam kom 'ns heij", "Iech bin mèt diech neet getroud", "Harlekino", "Doezend traone" en nog väöl mie! In al die jaore höbbe veer hiel väöl leuke dinger mètgemaak, te väöl um op te sjrieve en daodoor ouch oontèlbaar leuke leef luikes höbbe liere kinne, die allemaol e wèrrem plekske in us hart krege. Nao us prachtige oonvergetelikke 25-jaorig Zjubilei in 2010 waor de kook langzaam op. Ludy wow ziene druim (solo zinge) gere achternao en iechzelluf waor drök bezig mét mien zäöns in us eige verhuisbedrief. Eind 2012 beslote veer unne punt achter de Fiësta's te zètte en nog immer deit uzze naom (de Fiësta's) de runde in de regio en weure us 10(!) oetgebrachte CD-albums ouch nog steeds gedreijd op de radio, thoes, in de touringcar en ouch de DJ's dreije us nog dėks op eins wat veur e fees. Us 28-jaorige Fiësta's carrière kinne Ludy & Lou ut bèste in 2 wäörd umsjrieve ; GRUUTS & DAANKBAAR!