Lenie Menten is gebore in Mestreech op 11 Oktober 1940 en gestorreve op 26 Juli 2012. De femilie Menten is ein groete muzikaole femilie en allemaol speule zie op den' accordeon of wie me zeet in Mestreech 'ne trèkzak. Lenie Menten, de dochter vaan Thei, heet in de begin jaore vaan häör muzikaal leve gezónge in 't achtergroond koer vaan Mary Servaes beter bekind es de Zangerès Zoonder Naom In 1975 is Lenie same mèt häör neef Harrie Menten accordeon goon speule oonder de naom vaan Lenie & Harrie. Nao 'n aontal jaore waor 't gedoon mèt 't duo en Lenie góng zelf weijer op de solo tour en neet zoonder suksès. Lenie maakde häör ierste CD "Puur" mèt dao op 'n aontal nommers mèt ode aon häöre pap Thei. Oet ierbetoen aon häöre pap heet zie de nommers vaan Kermis Wals en de Cacewalk Polka op eigensten wijze opgenome. 't Nómmer "In Mestreech bin iech gebore" is 'ne groete hit gewore en weurt mèt de Vastelaovend euveral gedrejd. De CD "Puur” woort in 1997 opgenome in de studio vaan Daan Smit. Bekinde nommers vaan dee CD zien “In Mestreech bin iech gebore”, “Kermiswals”, “Heinzelmänchenwachtparade” en de bekinde “Cake Walk Polka”. In 1999 volgde de twiede CD “Langs de Maos”. Ouch dee CD woord ‘n suksès. Veural de nommers “C’est l’amour”, ”Leeveling”, “J’attendrai” mèt zaank vaan Anneke Augustin en netuurlek ‘t nommer “s’Aovends langs de Maos”. In 2000 brach zie oet ‘t Vastelaovends singelke “Us Hermenieke” dat dèks te hure waor op de radio en in Kaffees. ‘t Jaor daonao in 2001 kaom weer ‘ne single op de merret, naomelek “‘t Vastelaovends Kenon”. Ouch dat leedsje geit euver de kaomende Vastelaovend, vaan Es ‘t Vastelaovends kenon weurt aofgesjote oonder de Sint Jaan.....steit Mestreech op ziene kop enz. In 2002 woort ‘t weer tied um ‘n album oet te bringe, en ‘t woort ‘t album “Dit is Mien Leve”. De bekindste nommers op dees CD zien “In Mestreech bin iech gebore”, “Miene Gouwe”, “Mestreech iech höb diech leef”, “Foxtrot Medley” en “Wilde rozen”. Veur häöre inzat veur de meziek en ut in stand hawwe vaan dit erfgood woort zie in 2004 keuninklek oondersjeie.  In 2008 brach zie “Mèt hart en ziel” op de merret, ‘n mini-album mèt drei nommers: “Boe de Maos struimp”,”Spanje Olé” en “Mét Hart en Ziel”. Achter de geraniums zitte waor neet aon Lenie bestump en zie trooj altied nog op mèt fieste, in kaffees en zier zeker mèt de Vastelaovend in de Kaffee bij "Kien" in Wiek. Um ‘t gezèlleg te make en ‘t publiek te ammesere had zie neet miejer nudeg daan ‘ne stool, ‘n dröpke en häöre trekzak!

Met daank aon Lou Beckers